Web Analytics Made Easy - Statcounter
Home Videos Latest News Web Story

ગીર સોમનાથ જિલ્લાના તાલાલામાંથી પસાર થતી અને એશિયાટીક સિંહ પણ જે નદીના પાણીનો પીવા માટે ઉપયોગ કરે છે તે હીરણ નદીમાં પ્રદુષિત પાણી ઠાલવીને તેને પ્રદૂષિત કરવા સામે થયેલી પીઆઈએલમાં પીજીવીસીએલે હાઈકોર્ટને જણાવેલુ કે રાજ્યની 152 નગરપાલિકાઓમાંથી માત્ર 8થી 9 નગરપાલિકા દ્વારા જ નિયમિત રીતે વીજ બિલ ભરવામાં આવે છે. દરમિયાન, તાલાલા નગરપાલિકાએ જણાવેલુ કે તેઓ બાકી નીકળતુ વિજ બિલ ભરવા માટે લોન લેશે. મહત્વનુ છે કે, બુધવારે  હાઈકોર્ટે તંત્રને ટકોર કરેલી કે ગંદકી અને પ્રદુષણના લીધે લોકો ભોગ બનવા ન જોઈએ. હાઈકોર્ટે પીજીવીસીએલને નિર્દેશ આપ્યો હતો કે હાલ કામચલાઉ ધોરણે તાલાલા નગરપાલિકાને વીજ જોડાણ આપો. આ ઉપરાંત, તાલાલા સુએઝ ટ્રીટમેન્ટ પ્લાન્ટ (એસટીપી)ના બાકી રહેલા સમારકામની કામગીરી યુદ્ધના ધોરણે પૂર્ણ કરવાના પણ નિર્દેશ આપેલા.

હાઈકોર્ટે સરકારને એ પણ નિર્દેશ આપેલો છે કે તાલાલા નગરપાલિકા તેની બાકીની લેણી રકમ ભરે નહીં તો તે તાલાલા નગરપાલિકા સામે કાયદા મુજબ કાર્યવાહી કરે.   

ભૂતકાળમાં તાલાલા નગરપાલિકાએ હાઈકોર્ટમાં જવાબ રજૂ કર્યો હતો કે તાલાલા નગરપાલિકાને રૂ. 7.89 કરોડનુ વીજ બિલ ચુકવવાનુ બાકી છે, જેના લીધે એસટીપી પ્લાન્ટ બંધ છે. જેના લીધે, પ્રદુષિત પાણી ટ્રીટમેન્ટ કર્યા વગર જ સીધા ઠલવાય છે. નગરપાલિકાએ એસટીપી માટેની લાઈનો નાખી છે, પરંતુ વીજ જોડાણ ન હોવાથી આગળનુ કામ અટકેલુ છે. પીજીવીસીએલમાં બિલ ભરવાનુ બાકી છે, જેના લીધે પીજીવીસીએલ તેમને વીજ જોડાણ આપતુ નથી. તેઓ કોર્ટને વિનંતી કરે છે કે એસટીપી પ્લાન્ટને વીજ જોડાણ આપવામાં આવે.

બીજી તરફ, સરકારની રજૂઆત હતી કે, નેશનલ ગ્રીન ટ્રિબ્યુનલનો હુકમ છે કે, બધી જ નગરપાલિકામાં સુએઝ ટ્રીટમેન્ટ પ્લાન્ટ(એસટીપી) હોવા જોઈએ. જેથી, 20 નગરપાલિકામાં એસટીપી પ્લાન્ટ સ્થપાઇ ગયા છે. સરકારે આ માટે રૂ. 2,000 કરોડનુ ફંડ પણ રિલીઝ કર્યું છે. તાલાલા નગરપાલિકાના એસટીપીનું 85 ટકા કામ પૂરુ થઇ ગયુ છે.

અરજદારના વકીલની રજૂઆત હતી કે, હીરણ નદીમાં તાલાલા નંગરપાલિકા દ્વારા જ મંજૂરી લીધા વિના છેલ્લા ત્રણ વર્ષથી કેમીકલ યુક્ત અને ગટરનાં ગંદા પાણી ગેરકાયદે રીતે ઠાલવવામાં આવે છે. જેના લીધે, હિરણ નદી પ્રદુષિત બની છે. આ નદી તેની પ્રાકૃતિક સુંદરતા ખોઈ રહી છે, નદીમાં રહેલા કાચબા, મગર કે માછલીઓ સહિતની જળચર જીવ સૃષ્ટિ અને જંગલમાં વસવાટ કરતા સિંહ સહિતના વન્ય પશુઓ કે આ નદીનુ પાણી પીવે છે, તેમના જીવન પર ખતરો સર્જાયો છે. આ ઉપરાંત, હિરણ નદીના કાંઠે એક મોટી માનવ વસ્તી પણ વસે છે અને તે પણ આ નદીના પાણીનો ઉપયોગ કરે છે. જેના આરોગ્ય સામે પણ મોટો ખતરો સર્જાયો છે.