Web Analytics Made Easy - Statcounter
Home Videos Latest News Web Story

અમદાવાદ: ગુજરાત હાઇકોર્ટે ચુકાદો આપ્યો છે કે, વારસાઇ પ્રમાણપત્ર (સકસેશન સર્ટિફિકેટ) આપવા માટે કોર્ટના ન્યાયિક ક્ષેત્ર નક્કી કરતા બે પ્રકાર ભારતીય ઉત્તરાધિકારી કાયદા(ઇન્ડિયન સકસેશન એકટ)ની કલમ-371માં નિર્દિષ્ટ કરાયા છે. પરંતુ બીજા પ્રકારનો વિકલ્પ ત્યારે જ લાગુ પડી શકે કે જયારે અરજદાર એ બતાવવું પડે કે, મૃતકનું કાયમી રહેઠાણને કોઇ સ્થાન ન હતું.

હાઈકોર્ટનુ અવલોકન છે કે, કલમ-371ની બીજો ભાગ લાગુ કરવા માટે અને સંબંધિત કોર્ટમાં કે જેના ન્યાયિક ક્ષેત્ર હેઠળ મિલ્કતનો કોઇ હિસ્સો આવતો હોય તો પક્ષકાર કોર્ટ સમક્ષ જઇ શકે છે પરંતુ તેણે એ બતાવવુ પડે કે, ઇન્ડિય સકસેશન એકટની કલમ-371ની જોગવાઇનો પહેલો ભાગ લાગુ પડતો નથી કારણ કે, મૃતકની કાયમી રહેઠાણની કોઇ જગ્યા ન હતી. આ કેસમાં બે મૃતક અમેરિકા અને મુંબઇમાં એમ અલગ-અલગ જગ્યાએ ગુજરી ગયા છે. અરજદાર કલમ-371ના બીજા ભાગના આધારે વડોદરા ડિસ્ટ્રીક્ટ કોર્ટ સમક્ષ ગયા હતા અને દાવો કર્યો હતો કે, મૃતકની કેટલીક મિલ્કત વડોદરા કોર્ટના સ્થાનિક ન્યાયિક ક્ષેત્રમાં છે. જો કે, કલમ-371નો પહેલો ભાગ સમાપ્ત ન થાય ત્યાં સુધી અરજદાર વારસાઇ પ્રમાણપત્ર(સકસેશન સર્ટિફિકેટ) માટે સીધા નીચલી કોર્ટ સમક્ષ જઇ શકે નહી. કલમ-371નો બીજો ભાગ લાગુ પાડવા માટે અરજદારે મૃતકના રહેઠાણનું કોઇ કાયમી સ્થાન ન હતુ એ શરત પરિપૂર્ણ કરવી પડે. આ કેસમાં આવુ પુરવાર કરવામાં અરજદાર નિષ્ફળ રહ્યા છે અને તેથી નીચલી કોર્ટનો હુકમ યોગ્ય અને વાજબી છે. હાઇકોર્ટે સમગ્ર મામલામાં દરમ્યાનગીરી કરવાનો ઇન્કાર કરી અરજદારની રિટ અરજી ફગાવી દીધી છે.

હાઇકોર્ટે એ પણ નોંધ્યું છે કે, ઇન્ડિયન સકસેશન એકટની કલમ-371માં સ્પષ્ટ છે કે, ડિસ્ટ્રીક્ટ જજ કે જેના ન્યાયિક ક્ષેત્રમાં મૃતક વ્યકિત મૃત્યુ સમયે સામાન્ય રીતે ત્યાં રહેતો હોય અથવા તો તેના રહેઠાણનું કોઇ કાયમી સ્થાન ના હોય તો ડિસ્ટ્રીક્ટ જજ મૃતકની મિલકત સંદર્ભે વારસાઇ પ્રમાણપત્ર જારી કરી શકે છે.