Web Analytics Made Easy - Statcounter
Home Videos Latest News Web Story

અમદાવાદ: ગુજરાત યુનિવર્સિટીના સ્ટ્રોંગ રૂમમાં સીલબંધ પેટીમાં રાખવામાં આવેલી ઉત્તરવહીઓ ચોરી જે તે વિદ્યાર્થીઓને લખાણ લખાવી ફરી પાછી ઉત્તરવહીઓ સ્ટ્રોંગ રૂમમાં મૂકી દઇ વિદ્યાર્થી દીઠ રૂપિયા  વસૂલી બીએસસી નર્સીંગમાં પાસ કરાવવાના ચકચારભર્યા ઉત્તરવહી કૌભાંડમાં અત્રેની સેશન્સ કોર્ટે એબીવીપીના બે વિદ્યાર્થી નેતાઓ સન્ની મુકેશકુમાર ચૌધરી અને અમિતસિંહ સુરેશસિંહ રાજપૂતને આગોતરા જામીન આપવાનો સાફ ઇન્કાર કરી દીધો હતો. ગુજરાત સરકાર દ્વારા પેપર લીક કૌભાંડો બાદ તાજેતરમાં લાવવામાં આવેલ ગુજરાત જાહેર પરીક્ષા(ગેરરીતિ અટકાવવા બાબત) વિધેયક- 2023ની જોગવાઇને ધ્યાનમાં લઇ કોર્ટે બંને આરોપીઓની આગોતરા જામીન અરજી ફગાવી દીધી હતી.

ગુજરાત યુનવર્સિટીના ચકચારભર્યા ઉત્તરવહી કૌભાંડમાં એબીવીપીના બંને આગેવાનો સન્ની મુકેશકુમાર ચૌધરી અને અમિતસિંહ સુરેશસિંહ રાજપૂતની આગોતરા જામીન અરજીનો સખત વિરોધ કરતાં રાજય સરકાર તરફથી મુખ્ય સરકારી વકીલ સુધીર બી.બ્રહ્મભટ્ટે જણાવ્યું હતું કે, ગુજરાત યુનિવર્સિટીએ ખ્યાતનામ શૈક્ષણિક સંસ્થા છે અને તેના અધિકારી દ્વારા એફઆઇઆર નોંધાવાયેલી છે. પરીક્ષાના પેપર્સ સ્ટ્રોગ રૂમમાં રાખવામાં આવતા હતા અને તેની ચકાસણી થતી હતી ત્યારે તેમાંથી અમુક ઉત્તરવહીઓ ચોરાયેલ હોવાનું માલૂમ પડયુ હતું.  તપાસમાં ખુદ યુનિવર્સિટીના પાર્ટ ટાઇમ પટાવાળા સંજયનું નામ ખૂલતાં તેની ધરપકડ કરાઇ હતી. સીસીટીવી ફુટેજ પરથી પણ સ્પષ્ટ થાય છે કે, અરજદાર આરોપીઓએ ગુનાહિત કાવતરૂ રચી અલગ અલગ વિદ્યાર્થીઓનો સંપર્ક કરી તેઓને બીએસસી નર્સીંગમાં પાસ કરાવી દેવા પરીક્ષા આપતાં પહેલા વિદ્યાર્થી દીઠ રૂ. 50 હજાર પડાવ્યા હતા. ત્યારબાદ આરોપીઓએ વિદ્યાર્થીઓએ તેમના પેપર કોરા રાખવા અને તેમાં રોમન સેકશન-1 અને 2ની નિશાની કરવા તેમ જ છેલ્લે રફકામ લખી બે લીટી કરવાની સૂચના સાથે પેપર મૂકી દેવા જણાવાયું હતું. એ પછી આરોપીએ કાવતરૂ રચી તેમના માણસો દ્વારા સ્ટ્રોંગ રૂમમાંથી આવા પેપર્સ મેળવી લઇ આવી ઉત્તરવહીઓમાં જે તે વિદ્યાર્થીઓ પાસેથી લખાણ પૂર્ણ કરાવી ફરી પાછી ઉત્તરવહીઓ સ્ટ્રોંગ રૂમમાં મૂકાવી દીધી હતી. 

એટલું જ નહી, ફીઝીયોથેરાપીની પરીક્ષાના પેપરમાં પણ આ જ પ્રકારની નિશાનીવાળા વિદ્યાર્થીઓની ઉત્તરવહી પટાવાળા સંજય પાસેથી મળી આવી હતી.  સ્ટ્રોંગ રૂમના તેમ જ અન્ય જગ્યાના સીસીટીવી ફુટેજમાં પણ અરજદારોની હાજરી મળી આવી છે. એવીડેન્સ એકટની કલમ-27 હેઠળ પંચનામા કરી આવી ઉત્તરવહીઓ પણ કબ્જે લેવામાં આવી છે. આમ, આરોપીઓ વિરૂદ્ધ પ્રથમ દર્શનીય ગુનો સ્પષ્ટ થાય છે. આરોપી વિરૂધ્ધનો ગુને સમગ્ર સીસ્ટમ સામે પ્રશ્ન ઉભો થાય તેમ જ આમ જનતામાં પણ રોષની લાગણી ફેલાય અને પરિણામ સ્વરૂપે કાયદો અને વ્યવસ્થા સામે સવાલો ઉભા થાય તે પ્રકારનો ગંભીર ગુનો છે. એટલું જ નહી, આવા બનાવોથી શૈક્ષણિક સંસ્થાઓની પ્રતિષ્ઠાની સાથે સાથે મહેનતુ વિદ્યાર્થીઓના ભવિષ્ય પણ જોખમમાં મૂકાય તેવો આ ગુનો છે. સરકાર દ્વારા જે નવો કાયદો લાગુ કરવામાં આવ્યો છે તેમાં આવા ગુનાની દસથી 14 વર્ષ સુધીની કેદની આકરી સજાની જોગવાઇ કરાઇ છે ત્યારે ગુનાની ગંભીરતા જોતાં કૌભાંડના મૂળ અને સત્ય સુધી પહોંચવા આરોપીઓની કસ્ટોડિયલ ઇન્ટ્રોગેશન ખૂબ જરૂરી જણાય છે. તેથી આરોપીઓની આગોતરા જામીન અરજી ફગાવી દેવામાં આવે.